Ստորագրվեց ռազմավարական համագործակցության հուշագիր Հայաստանի երիտասարդական հիմնադրամի և ՌԴ «Երիտասարդական ռեսուրս կենտրոն» դաշնային պետական կազմակերպության միջև

 

 

Հայաստանի երիտասարդական հիմնադրամը և Ռուսաստանի Դաշնության «Երիտասարդական ռեսուրս կենտրոն» դաշնային պետական կազմակերպությունը փետրվարի 27-ին ստորագրեցին ռազմավարական համագործակցության հուշագիր։
Համաձայնագիրը նպատակ ունի կողմերի միջև զարգացնել միջազգային համագործակցությունը, սատարել երիտասարդ առաջնորդների նախաձեռնություններին, աջակցել առողջ ապրելակերպի, գիտության և կրթության, պետական կառավարման, կամավորության և այլ ոլորտներում փոխգործակցությանը։
«Երիտասարդական ռեսուրս կենտրոն» դաշնային պետական կազմակերպության տնօրեն Ալեքսեյ Լյուբցովը, ողջունելով հանդիպման մասնակիցներին, կարևորեց հայաստանյան գործընկերների հետ գործակցությունը, որը նախապատմություն ունի, սակայն այսօր արդեն պաշտոնական հիմքերի վրա է դրվում։ Պարոն Լյուբցովը նկատեց, որ Հայաստանում իրենք ունեն գործընկերներ, սակայն շահագրգռված են նրանց շրջանակն ընդլայնելու, ինչը կնպաստի երկկողմ հարաբերությունների ամրապնդմանը, կբարձրացնի աշխատանքի արդյունավետությունը։
Հայաստանի երիտասարդական հիմնադրամի գործադիր տնօրեն Ալեքսանդր Տեր-Հովակիմյանը նկատեց, որ հիմնադրամի և ՌԴ «Երիտասարդական ռեսուրս կենտրոն» դաշնային պետական կազմակերպության միջև արդեն կայացած համագործակցության փորձը ավելի ծանրակշիռ, առարկայական ու հիմնավոր են դարձնում ստորագրված փաստաթուղթը։ «Այսօրվա համաձայնագիրը իրավաբանորեն ամրագրում է բոլոր այն հնարավորությունները և ցանկությունները, որ ունեն կողմերը։ Առավել քան համոզված եմ, որ գործակցությունը լինելու է արդյունավետ ու անհրաժեշտ երկու երկրների երիտասարդների համար»,- ասաց պարոն Տեր-Հովակիմյանը։
Հանդիպման ընթացքում քննարկվեցին համաձայնագրի կետերը, անդրադարձ եղավ ՌԴ և ՀՀ երիտասարդների մասնակցությամբ առաջիկա ծրագրերին։