Բժշկականում ինքնաթեստավորվեցին

 

 

Դեկտեմբերի 1-ին՝ ՁԻԱՀ-ի դեմ պայքարի միջազգային օրը, Հայաստանի երիտասարդական հիմնադրամը Երևանի Մ. Հերացու անվան բժշկական համալսարանում բուհի ուսանողական խորհրդարանի հետ համատեղ կազմակերպեց ինքնաթեստավորում, որին մասնակցեցին ապագ բժիշկները։ ԵՊԲՀ ուսանողների հետաքրքրությունը մեծ էր, միջոցառման շրջանակներում երիտասարդները տեղեկացան թեստավորման նորարարական և առաջադեմ մեթոդի մասին, որը թույլ է տալիս վայրկյանների ընթացքում իմանալ սեփական ՄԻԱՎ կարգավիճակը, իմացան, թե ինչպես կարելի է ինքնաթեստավորվել, և արդյունքն իմանալու դեպքում ինչ քայլեր պետք է ձեռնարկել։ Դրանից հետո ցանկացողները ինքնաթեստավորվեցին։ Ընդհանուր առմամբ ինքնաթեստավորվեց ավելի քան 120 երիտասարդ։
Հայաստանի երիտասարդական հիմնադրամը ՄԱԿ-ի ՄԻԱՎ/ՁԻԱՀ Միացյալ ծրագրի տեխնիկական աջակցությամբ իրականացնում է «Հայաստանում ՄԻԱՎ-ի վերաբերյալ թեստավորման մատչելիության ապահովում` ՄԱԿ-ի ՄԻԱՎ/ՁԻԱՀ միացյալ ծրագրի նպատակներին հասնելու ճանապարհին» ծրագիրը: Ծրագրի շրջանակներում ՀՀ բոլոր մարզերի և Երևանի ավելի քան 30 000 երիտասարդ/միգրանտ իրազեկվում/կրթվում է ՄԻԱՎ-ի, վերջինիս կանխարգելման վերաբերյալ, կարևորում ՄԻԱՎ-ի վերաբերյալ հետազոտությունը, տեղեկանում ինքնաթեստավորման հնարավորության մասին: Ակնկալվում է, որ ծրագրի արդյունքում 15 000 երիտասարդ/միգրանտ կինքնաթեստավորվի ՄԻԱՎ-ի վերաբերյալ և կիմանա իր ՄԻԱՎ կարգավիճակը:
Միջոցառմանը ներկա էր նաև ՄԱԿ-ի ՄԻԱՎ/ՁԻԱՀ միացյալ ծրագրի հայաստանյան գրասենյակի ղեկավար Լենա Նանուշյանը։