Առցանց դասավանդման հմտություններ՝ օտար լեզու ուսուցանողներին

 

 

Օտար լեզուների 25 դասավանդողներ, 5 ուսանողներ, 3 փորձագետներ կատարելագործում են իրենց հմտությունները ՏՀՏ-ների՝ լեզուների դասավանդման գործընթացում կիրառման ոլորտում: Մայիսի 4-ին Երևանի Վ. Բրյուսովի անվան պետական լեզվահասարակագիտական համալսարանում (ԵՊԼՀ) մեկնարկեց «Առցանց դասավանդման հմտությունների զարգացումը 21-րդ դարի լսարանի համար» թեմայով երկօրյա աշխատաժողովը: Այն անցկացնում են Եվրոպայի խորհրդի Ժամանակակից լեզուների եվրոպական կենտրոնը, Հայաստանի երիտասարդական հիմնադրամը և ԵՊԼՀ ուսանողական խորհուրդը: Բացման խոսքում ԵՊԼՀ ռեկտորի գլխավոր խորհրդական Հասմիկ Ափյանը վստահեցրեց, որ աշխատաժողովի ընթացքում ստացված գիտելիքները անհրաժեշտ են լեզուների ուսուցման գործընթացում. «21-րդ դարում ՏՀՏ-ների կիրառումը, մասնավորապես լեզուների դասավանդման ոլորտում, անհրաժեշտություն է: Ուստի վստահ ենք, որ ստացված գիտելիքներն անպայման դասավանդողները կօգտագործեն իրենց ամենօրյա մասնագիտական գործունեության ընթացքում»:
ՀՀ ԿԳՆ բարձրագույն և հետբուհական մասնագիտական կրթության վարչության քաղաքականության մշակման բաժնի ավագ մասնագետ Սյուզաննա Ղազարյանն էլ հատկապես կարևորեց այն, որ ԵՊԼՀ ուսանողական խորհուրդը մշտապես նմանատիպ աշխատաժողովներ է անցկացնում և վստահեցրեց, որ դրանք կլինեն շարունակական:
Տեղեկացնենք, որ վերապատրաստումն անցկացնում են Եվրոպայի խորհրդի ժամանակակից լեզուների եվրոպական կենտրոնի փորձագետներ Սառա Հայսերը (Լոնդոնի Բաց համալսարան, Մեծ Բրիտանիա), Փոլին Էռնեստը (Օբյերտա դը Կատալունիայի համալսարան, Իսպանիա), Ալին Գերման Ռաթերֆորդը (Օտտավայի համալսարան, Կանադա): Աշխատաժողովի ընթացքում կանցկացվեն լեզուների դասավանդման մեջ ՏՀՏ-ների կիրառման թեմայով կլոր սեղան և պլենար քննարկումներ, խմբային աշխատանքեր, լավագույն փորձի ներկայացում, առցանց շնորհանդեսներ, ինքնազարգացման պլանի նախագծում: Մայիսի 5-ին՝ աշխատաժողովի ավարտին, մասնակիցները կստանան սերտիֆիկատներ: