Վեր են հանվում Թուրքիայի և համաշխարհային ուժային կենտրոնների միջև հակասությունները

 

 

Դեկտեմբերի 22-ին ՀՀ ԳԱԱ պատմության ինստիտուտում տեղի է ունեցել Արմեն Մարուքյանի «Հայոց ցեղասպանության հիմնահարցը համաշ¬խար¬հային քաղաքականության ազդեցիկ դերա¬կատար¬ների` Թուրքիայի հետ հարաբերություն¬ների համատեքստում» գրքի շնորհանդեսը։
Աշխատությունում ներկայացված է համաշխարհային քաղաքականության ազդեցիկ դերակատարների՝ Ռուսաստանի, ԱՄՆ-ի և Եվրամիության՝ Թուրքիայի հետ հարաբերությունների ներկա վիճակը։ Հայոց ցեղասպանության հիմնահարցը քննարկվում է Ռուսաստան-Թուրքիա, ԱՄՆ-Թուրքիա և ԵՄ-Թուրքիա հարաբերություններում առկա հակասությունների ու շահերի բախման համատեքստում։ Գրքում ներկայացվում են առաջարկներ՝ ստեղծված իրավիճակում ՀՀ արտաքին քաղաքական գերատեսչության և սփյուռքի լոբբիստական կառույցների կողմից նշված ուժային կենտրոններում հատկապես Հայոց ցեղասպանության հետևանքների հաղթահարման հարցում համապատասխան տրամադրվածություն ստեղծելու առումով։
Նշենք, որ աշխատությունը հրատարակվել է ՀՀ Նախագահի աշխատակազմի կողմից «Օրենքի ուժով» ՀԿ-ին հատկացված դրամաշնորհի և Հայաստանի երիտասարդական հիմնադրամի հայտարարած մրցույթի շրջանակներում։
Գրքի հեղինակ, ՀՀ ԳԱԱ-ի պատմության ինստիտուտի Հայկական հարցի և Հայոց ցեղասպանության պատմության բաժնի վարիչ, «Օրենքի ուժով» ՀԿ-ի նախագահ Արմեն Մարուքյանը նշում է, որ հետազոտության մեջ չեզոքացվում է այն կարծրատիպը, թե Թուրքիան փայլուն հարաբերություններ ունի ուժային տարբեր կենտրոնների հետ։ Այս ամբողջ հակասությունների փաթեթը, այս շահերի բախումները մեր լոբբիստական կառույցները պետք է փորձեն իրենց զինանոցում ունենալ և ուժային կառույցների համար նրանց աշխատանքներում պետք է ապացուցվի, թե վերջիններս ինչ օգուտներ, շահեր կարող են ունենալ՝ Հայոց ցեղասպանության հետևանքների հաղթահարման հարցում օգնելով հայ ժողովրդին։
Ծրագրի իրականացման ընթացքում «Օրենքի ուժով» ՀԿ-ն նաև սիմուլյացիոն բանակցություններ է կազմակերպել տարբեր ուսումնական հաստատությունների մագիստրատուրայի ուսանողների մասնակցությամբ։ Ուսանողներն այդ բանակցություններում, հանդես գալով տարբեր երկրների ներկայացուցիչների դերում, փորձում էին Թուրքիայի հետ հարաբերություններում առկա հակասությունները քննարկել և այդ հոլովույթում դիտարկել Հայոց ցեղասպանության հարցը։
ԳԱԱ պատմության ինստիտուտի փոխտնօրեն Կարեն Խաչատրյանը նկատեց, որ աշխատության մեջ համապարփակ ներկայացված է Թուրքիայի հետ հարաբերությունների համատեքստում համաշխարհային ազդեցիկ դերակատարների քաղաքականությունը։ «Այսօրվա միջազգային հարաբերություններում Թուրքիայի վրա պետք է համաշխարհային ճնշում գործադրվի, որպեսզի պետականորեն ամենաբարձր մակարդակով նրանք առերեսվեն սեփական պատմության հետ, ընդունեն Հայոց ցեղասպանությունը։ Այսօր իրավիճակն աշխարհում, մեր տարածաշրջանում շատ դինամիկ է զարգանում, և նման հեռանկարը ֆանտաստիկայի ժանրից չէ։ Մենք նման զարգացումներին պետք է պատրաստ լինենք։ Պետք է պատրաստ լինենք առաջին հերթին նաև նման հետազոտությունների շնորհիվ»,- նշել է պատմության ինստիտուտի փոխտնօրենը։
«Հայոց ցեղասպանության հիմնահարցը համաշ¬խար¬հային քաղաքականության ազդեցիկ դերակատար¬ների` Թուրքիայի հետ հարաբերություն¬ների համատեքստում» աշխատությունը տպագրվել է 500 օրինակով։ Այն հասանելի է լինելու նաև համացանցում՝ ԵՊՀ Հայագիտական հետազոտությունների ինստիտուտի և ԳԱԱ պատմության ինստիտուտի կայքերում։